فضلت باصص لأمي وأنا مش قادر أستوعب آخر جملة قالتها قلت لها بصوت متوتر يعني إيه الشخص ده لسه قريب مني؟ مي بصت حوالين منها كأنها خايفة حد يكون بيراقبنا وبعدين قالت أبوك ما كانش لوحده يا كريم قلت لها مين؟ سكتت شوية وبعدين قربت مني وقالت عمك محمود اتصدمت عمي محمود كان أكتر شخص في العيلة كنت بثق فيه بعد أبويا
راجل هادي ودايما واقف جنبي ومن وأنا صغير وهو بيقولي إن أبويا كان بيحبني أكتر من أي حد
قلت لها
مستحيل
أمي ردت بهدوء
أنا عارفة إنك مش هتصدقني
وبعدين طلعت ظرف قديم من شنطتها ومدتهولي
قالت
خد ده
فتحت الظرف بإيدي المرتعشة
لقيت صور قديمة وأوراق وتحويلات بنكية وشوية خطابات مكتوبة بخط إيد أبويا
قريت أول ورقة
وكان واضح فيها إن أبويا دفع مبلغ كبير لحد عشان يخرجني أنا وأمي من حياته من غير ما حد يعرف
لكن المفاجأة كانت في آخر الصفحة
كان فيه توقيع عمي محمود
حسيت إن دماغي ضربت
قلت
إنتي متأكدة إن ده توقيعه؟
قالت
أنا شوفته بعيني وهو بيمضي
قعدت على الدكة وأنا مش قادر أقف
كل الصور اللي في دماغي عن طفولتي بدأت تتغير
افتكرت أيام كنت بصحى فيها بالليل وأنا بعيط وأنادي على أمي
وأبويا كان بيقوللي
مامتك ماتت يا كريم
افتكرت كمان إن عمي محمود كان دايما موجود وقتها
كان بياخدني من إيدي ويقوللي
خليك راجل زي أبوك
بصيت لأمي وقلت
طب وسيف؟
عينيها دمعت
سيف اتاخد مني بعد ما اتولدت بأيام
قلت بسرعة
اتاخد فين؟
قالت
أبوك قاللي إنه هيربيه بعيد عني وإنه هيخليه يعيش حياة أحسن
قلت
وإنتي وافقتي؟
صرخت لأول مرة
كنت محاصرة يا كريم!
أبوك كان ماسك كل حاجة
الفلوس والبيت والناس وحتى الشرطة
ولما حاولت أهرب بيك وبأخوك هددني إنه هيخليني أدخل مستشفى المجانين ويقول إني فقدت عقلي
سكتت لحظة ومسحت دموعها
أنا حاولت أدور على سيف سنين
لكن كل مرة كنت بقرب منه كان حد بيظهر ويهددني
قلت
طب إزاي عرفتي إنه اسمه سيف؟
قالت
لأني أنا اللي سميته
وقبل ما أكمل كلامي تليفوني رن
كان المحامي حسام
رديت
أيوه يا حسام
صوته كان مختلف
أستاذ كريم لازم تيجي المكتب حالا
قلت
ليه؟
قال
لقيت ملف باسم والدتك
بس فيه حاجة أخطر من كده
قلت
إيه؟
سكت ثانيتين وقال
لقيت شهادة ميلاد لطفل اتولد في نفس اليوم اللي والدتك قالت إنها ولدت فيه
قلت
سيف؟
قال
المشكلة مش هنا
المشكلة إن اسم الأب في الشهادة هو فؤاد الشاذلي
لكن اسم الأم مش موجود
وبعدين قال جملة خلتني أحس إن الأرض بتتهز تحت رجلي
الطفل ده اتسجل إنه مات بعد الولادة بثلاث ساعات
بصيت لأمي
وشها كان مصفر
قلت
إنتي كنتي عارفة؟
هزت راسها وهي بتعيط
كنت عارفة إن أبوك قاللي إن سيف مات
لكن عمري ما صدقت
وفجأة موبايل أمي رن
بصت للشاشة واتجمدت
قلت
مين؟
قالت بصوت مرتعش
رقم كنت مستنياه من تلاتين سنة
مدت إيدها للتليفون لكن قبل ما ترد وصلتها رسالة
فتحتها
وبعد ما قرتها رفعت عيني في عيني وقالت
سيف عايش
قلت
إنتي عرفتي منين؟
مدتلي الموبايل
وكان مكتوب في الرسالة
“لو عايز تعرف أخوك فين تعالى لوحدك الليلة الساعة عشرة عند محطة مصر”
وقبل ما أستوعب اللي قريته وصلت رسالة تانية من نفس الرقم
“وخلي بالك يا كريم… عمك محمود عرف إنك قابلت أمك”
فضلت واقف قدام أمي وأنا ماسك الموبايل ومش قادر أصدق اللي قريته
عمك محمود عرف إنك قابلت أمك
الجملة دي كانت بتلف في دماغي زي الرصاصة
بصيت لأمي وقلت
إنتي لازم تمشي من هنا حالا
هزت راسها وقالت
مش هينفع يا كريم
ليه؟
لأنهم لو عرفوا إني لسه عايشة مش هيكتفوا إنهم يبعدوك عني المرة دي
قربت منها وقلت
مين هيعمل فيكي حاجة؟
بصتلي في عيني وقالت
نفس الناس اللي خلوا سيف يختفي
اتصلت بحسام المحامي وقلتله يفضل فاتح الخط معايا
وبعدين طلبت من أمي تركب معايا العربية
طول الطريق كانت ساكتة
وأنا لأول مرة أحس إن الست اللي طول عمري فاكرها ماتت كانت قاعدة جنبي
أمي
أمي اللي حرمت منها تلاتين سنة
وصلنا شقتي وقبل ما ندخل وقفت قدام الباب فجأة
قلت
في إيه؟
قالت
أنا كنت هنا قبل كده
استغربت
إزاي؟
قالت
أبوك كان بيجيبني هنا وأنا مستخبية قبل ما يقرر يعلن إني مت
بصيت لها بدهشة
يعني إنتي عارفة البيت ده؟
قالت
أنا عارفة كل حاجة عن أبوك
دخلنا
أمي فضلت تمشي في المكان وهي بتبص على الحيطان
وقفت قدام صورة أبويا
وقالت
هو لسه معلق صورته في كل مكان؟
قلت
كان بالنسبة لي أعظم واحد في الدنيا
بصتلي بحزن وقالت
كان بيعرف يخليك تصدق اللي هو عايزه
الجملة دي وجعتني
لأني فجأة افتكرت حاجة
