
أحمد ضرب المكتب بإيده بغضب وقال: “ولاد الكلب! قتلوا حتتين لحم عشان الفلوس؟ طب والتقرير اللي معاكِ ده إيه؟”، قولتله: “التقرير ده أنا اللي عملته بنفسي، قبل الوفاة بيومين، لما ياسين دخل في التشنج الأخير، أنا مروحتش المستشفى بتاعهم، أنا أخدت عينة من دم الواد ورحت لمعمل تحاليل سري بتاع واحد صاحبي من أيام القضايا القديمة، النتيجة طلعت صدمة.. دم الواد كان فيه نسبة عالية جداً من مادة ‘الديجوكسين’، دي مادة بتستخدم لعلاج أملاح القلب بجرعات دقيقة جداً، بس لو اتأخدت بجرعات عالية للأطفال بتعمل هبوط حاد في الدورة الدموية وتوقف القلب، وتظهر في الأشعة العادية كأنها سكتة قلبية طبيعية بسبب ضعف المناعة”.
أحمد بص في التقرير وعينيه وسعت: “يعني هما مكنوش بيستنوا المرض.. دول كانوا بيسموهم بجرعات منتظمة!”، هزيت راسي ودموعي نزلت غصب عني: “آه.. فوزية كانت بتحط النقط دي في الشاي بالنعناع اللي كانت بتقولي إشربيه عشان ترضعي، ولما لقيتني مبقاش عندي لبن بسبب التعب، بقت تحطها في الببرونات بنفسها.. واليوم اللي ماتوا فيه، أنا شفتها بعيني وهي بتغسل الببرونة في المطبخ وبتخبي قزازة قطرة صغيرة في صدر جلابيتها، ولما واجهتها في الصوان ودست على طرفها، افتكرت إنها كَسرتني بالضرب والتهديد، مكنتش تعرف إن القلم اللي ادهتوني والوقعة على الخشبة كانت هي القشة اللي هتقطم رقبتها، لأن الكاميرا اللي في الدبوس سجلت اعترافها الصريح وصوت ابنها وهو بيغطي عليها”.
أحمد قام من ورا مكتبه واستدعى وكيل النيابة فوراً، وبدأت التحقيقات الرسمية تتفتح، في أوضة التحقيق اللي جنمبنا، كان مصطفى قاعد وشه في الأرض، منهار تماماً وبيعيط زي الحريم، أول ما واجهوه بتسجيل الصوت وصورة الكاميرا الميكرو وبوليسة التأمين وتقرير المعمل الجنائي اللي أمر بأخذ عينة من جثامين الأطفال قبل الدفن، انهار واعترف بكل حاجة، قال: “أمي هي السبب! أمي هي اللي قالتلي الشركة هتقع وهنتحبس والعيال لسه صغيرين ويقدروا يجيبوا غيرهم، بس الفلوس دي هتنقذنا من السجن! أنا مكنتش عايز أموتهم.. أنا كنت بقول كفاية تعب بس أمي زودت الجرعة عشان تخلص!”
أما الحجة فوزية، فكانت قاعدة زي الحرباية، رافضة تتكلم وبتقول: “ده تآمر عليا عشان تاخد شقتي.. البت دي حاطة عينيها على مالي!”، بس لما وكيل النيابة جاب لها أمر ضبط وإحضار للدكتور قرايبها اللي في مستشفى أكتوبر، ولما عرفت إن الدكتور أول ما اتمسك اعترف بإنها ادتله 200 ألف جنيه عشان يزور التقارير الطبية ويطلع شهادات الوفاة بمرض وراثي، وقعت على الأرض وجالها شلل نصفي مؤقت من الصدمة، وبقت تبرق بعينيها ومش قادرة تنطق كلمة واحدة.
النيابة أمرت بحبس مصطفى وفوزية والدكتور 15 يوم على ذمة التحقيق بتهمة القتل العمد والنصب والتزوير، وخرجت من المديرية والفجر كان بيشقشق على شوارع القاهرة، الجو كان ساقع بس حاسة بنار في صدري بدأت تهدأ وتبقى رماد، رحت على المدافن تاني، قعدت على الرصيف قدام باب المقبرة، وبصيت للسما وقولت: “يا رب.. أنا جيت وجبت حقهم، بس ناري مبردتش.. ناري مش هتبرد غير لما أشوف حبل المشنقة بيلف حوالين رقبتهم”.
مرت الأيام والشهور، والقضية اتحولت لمحكمة الجنايات، وبقت قضية رأي عام، الجرايد كلها كانت بتكتب عن “سفاحة السيدة زينب وابنها الندل”، وفي كل جلسة كنت بروح وأقعد في أول صف، لابس الأسود بتاعي، وباصص في عينيهم وهما جوه قفص الاتهام، مصطفى كان شعره شاب ودقنه طلعت وبقا زي العجوز، وفوزية كانت قاعدة على كرسي متحرك، بوقها معوج و عينيها مليانة رعب كل ما عيني تيجي في عينها.
وفي جلسة النطق بالحكم، القاعة كانت زحمة لدرجة الخنق، رئيس المحكمة وقف، وبدأ يقرا حيثيات الحكم بصوت رخيم يهز القلوب، اتكلم عن بشاعة الجريمة، وعن إنعدام الإنسانية والأمومة، وعن إن الجاني لم يرحم ضعف الطفولة ولا دموع الأم، وفي الآخر رفع عينيه وبص للقفص وقال: “حكمت المحكمة حضورياً وبإجماع الآراء، أولاً: بمعاقبة فوزية السيوفي ومصطفى عبد الرحمن بالإعدام شنقاً عما أسند إليهم.. ثانياً: بمعاقبة المتهم الثالث بالطرد من نقابة الأطباء والسجن المشدد 15 سنة”.
القاعة انفجرت بالصراخ والتهليل، ناس كتير كانت بتعيط وفرحانة بالعدل، مصطفى صرخ ووقع في الأرض يلطم ويزعق: “يااا رب لا! أنا مقتلتش! أمي هي اللي قتلت!”، والحجة فوزية بدأت تطلع أصوات غريبة من بوقها المعوج وعينيها طلعت لبرة كأنها بتشوف ملاك الموت قدامها، أنا م صرختش ومصقفتش، أنا وقفت بكل هدوء، وبصيت ليهم جوه القفص، ورفعت إيدي وشاورت لهم بصباعي الصغير بمعنى “خلصت”، ولفيت ضهري وخرجت من القاعة وأنا حاسة إن روحي رجعتلي تاني.
بعد الحكم بشهرين، جالي جواب رسمي من السجن، بصفتي ولية دم ومن حقي أحضر تنفيذ حكم الإعدام لو طلبت، أنا رفضت أحضر تنفيذ مصطفى، مكنش يهمني أشوفه وهو بيموت، لأنه كان ميت في نظري من زمان، بس طلبت أحضر تنفيذ حكم فوزية.
يوم التنفيذ، كان المكان ضلمة وكئيب جوه سجن الاستئناف، ريحة الموت كانت مالية الممرات، دخلت أوضة التنفيذ وكان واقف مأمور السجن والشيخ وعشماوي اللي ماسك الحبل الأسود التخين، دخلوا فوزية وهي مجرورة على الكرسي، وشها كان خالي من أي ملامح بشرية، كأنها مسخ، لما شافتني واقفة، عينيها وسعت وحاولت تصرخ بس صوتها طلع مخنوق، الشيخ بدأ يقرا عليها آيات التوبة ويسألها لو عايزة تقول حاجة أخيرة، بصتلي والدموع نزلت من عينها المعوجة، وقالت بصوت متقطع طالع بالعافية: “سامحيني يا مونيا.. خلي عيالك يسامحوني.. أنا بشوفهم كل ليلة واقفين على السرير وبيخنقوني.. سامحيني عشان أموت مرتاحة”.
قربت منها لحد ما بقيت واقفة قدام وشها بالظبط، وعشماوي واقف وراها مستني الإشارة، بصيت في عينيها بمنتهى البرود، وربعت إيدي وقولتلها بفحيح أرعب من اللي قالتهولي في العزا: “الرب اللي أنتِ قولتي إنه خد عيالي عشان أنا أم وحشة.. هو نفسه اللي جابني هنا النهاردة عشان أشوف رقبتك وهي بتتلوح على الحبل.. أنا مش هسامحك، وعيالي مستنيينك تحت عشان يكملوا خنق فيكِ.. دوقي بقا”.
شاورت لعشماوي، وفي ثانية حط الكيس الأسود على وشها، ولف الحبل حوالين رقبتها، وتكة الذراع الحديدي رنت في الأوضة، والجسم سقط في البئر ومرجحة الحبل بدأت، صو ت طقطقة العضم كان هو الموت المزيكا اللي كنت مستنياها بقالي سنتين.
خرجت من السجن، الشمس كانت بتطلع وتغسل شوارع القاهرة من الضلمة، حسيت بنسمة هواء باردة ونقية دخلت صدري لأول مرة من يوم موت ولادي، ركبت عربيتي ومشيت، وكنت فاكرة إن كل حاجة خلصت وإن الصفحة اتقفلت والعدالة خدت مجراها بالملي.
رجعت بيتي القديم، البيت اللي شهد كل الوجع ده، عشان ألم باقي حاجتي وأقفل المكان ده للأبد وأسافر أبدأ حياة جديدة برة مصر، وأنا بفتح الدولاب بتاع مصطفى عشان أشوف لو في أوراق تخصني، لقيت درج سري تحت الخشب مكنتش شفته قبل كده، سحبته بالراحة، لقيت جواه علبة قطيفة حمرا صغيرة، فتحتها.. لقيت جواها المفاجأة اللي خلت ركبي تخبط في بعضها وقلبي يقف من الرعب.
جوه العلبة كان في فلاشة ميموري صغيرة جداً، وعليها ورقة مكتوبة بخط إيد مصطفى قبل ما يتمسك بيومين، مكتوب فيها: “مونيا.. لو أنتِ بتقري الكلام ده، يبقا أنا وأمي خلاص انتهينا وأنتِ كسبتِ.. بس في حاجة أمي مكنتش تعرفها وأنا مخبيها عن الدنيا كلها.. بوليسة التأمين مكنتش بمليون دولار بس، أنا كنت مأمن على حياتك أنتِ كمان بـ 3 مليون دولار، والسم اللي أمي كانت بتحطه للعيال.. أنا كنت بحط منه جرعات صغيرة جداً في علبة الفيتامينات بتاعتك اللي بتاخديها كل يوم عشان تموتي بالتدريج بعدهم بـ 6 شهور وتبان وفاء طبيعية من الحزن.. الجرعة الأخيرة المفروض تكون اشتغلت في جسمك من أسبوع.. تفتكري الوجع اللي في جنبك الشمال ده تشنج عضلات؟”
في اللحظة دي.. حسيت بنغزة حادة وموتة في جنبي الشمال، وعيني بدأت تكسر والضلمة بدأت تهاجم نظري، والتليفون في إيدي رن.. وكان رقم غريب.. ولما فتحت الخط، طلع صوت الدكتور اللي كان محبوس، وهو بيقول بنبرة مرعبة: “مونيا هانم.. أنا هربت من المستشفى بتاع السجن والبوليس قالب الدنيا عليا.. بس أنا كلمتك عشان أقولك إن الترياق بتاع المادة اللي في جسمك مش مع مصطفى.. الترياق معايا أنا، ولو عايزة تعيشي.. قدامك نص ساعة بالظبط وتجيلي العنوان ده.. لوحدك!”.




