
وصحي تاني يوم الصبح علشان يروح شغله طبعا لقى رانيا نايمه زي ما هي فدخل اخذ شاور وخرج لقاها برده نايمه زي ما هي فراح عليها وصحاها وقال لها
رانيا قومي جهزي لي لبسي والفطار عقبال ما اعمل مكالمه تليفون واخرج علشان خاطر عندي شغل مستعجل
ودخل يعمل المكالمه واخذ يجي ربع ساعه ورجع تاني لقاها نايمه زي ما هي وما اتحركتش من مكانها نفخ بوشه ولبس هدومه ومشي راح على شغله من غير فطار
وكل يوم على هذا الحال لا بيفطر قبل ما ينزل الشغل ولا بيرجع يلاقي غداء جاهز ودائما البيت مبهدل والدنيا مش مظبوطه وعاييشين على الدليفري
لحد ما في يوم كان عنده عشاء عمل فجه يدور على هدومه لقى الهدوم كلها وسخه وريحتها مش نظيفه تقريبا كده هي ما غسلتلوش اي هدوم
راح عليها وقال لها
انت يا ست هانم يا اللي مش في دماغك المزبلة اللي احنا عايشين فيها هدومي كلها وسخه وما اتغسلتش والشرابات كل شراب في حته وبقيت حاسس ان انا ولا عارف اكل ولا اشرب ولا اعيش
بصيت له بلا مبالاه وقالت له
يا بيبي اللي مزهقك كده ومخليك تعلي صوتك عليا ومحمر لي عينيك هو انت جايبني هنا الخدامة اللي تغسل لك وتطبخ لك وتلبسك
انصدم من ردها وقال لها
هي اللي تراعي بيتها وتشوف اللي بيحتاجه ومستلزماته تبقى خدامة في وجهه نظرك
جاوبته بزهق وملل
من الاخر كده يا اسلام انت تشوف لي خدامة تساعدني هنا في شغل البيت لان انا مش واخده على الحاجات دي وبالاخص ما ليش فيها
وبالنسبه للهدوم واديها الدراي كلين وهم هيجيبوها مغسوله ومكويه انا ما ليش في امور الغسيل والطبيخ والحاجات دي وانت عارف كده كويس قوي
لسه هيرد عليها لقى موبايله رن برقم ابنه فورا رد عليه وقال له
حبيب بابي ازيك يا هادي عامل ايه واحشني خالص يا حبيبي
رد عليه هادي وهو زعلان
انا لو وحشتك يا بابا كنت جيت سالت عليا وشفتني انت بقالك اسبوع بعيد عننا وما شفنكش انا عندي تدريب النهارده في النادي ونفسي انت اللي تيجي معايا
حس بوجع في قلبه من كلام ابنه ورد عليه على طول
معلش يا حبيبي كان عندي شغل كتير متعطل قول لي هو ميعاد التدريب امتى عشان هاجي معاك
جاوبه هادي بفرحه وهو بيتنطط
التدريب كمان ساعه يا بابي انا خلاص قربت اخلص الهوم ورك وماما هتلبسني وهستناك
طمنه اسلام ان هو هيجي له كمان ساعه وقفلوا مع بعض وراح هادي لوالدته علشان يستاذنها ان باباه هو اللي هياخده للتمرين علشان هو وحشه ونفسه يقضي وقت معاه
ووافقت طبعا ياسمين لان ولادها ملهومش علاقه باللي حصل بينها وبين جوزها وهي مش عايزه تدمر نفسيتهم هي اهم حاجه عندها في الدنيا
وجه اسلام واخد هادي للتدريب وراح معاه
واستناه لما اخلص التدريب وهم مروحين قال له
تعالى بقى يا حبيب قلبي اعزمك على غدا بره ونتغدى مع بعض انا وانت
رد عليه ابنه بسرعه وبحماس
معلش يا بابي مش هقدر اجي معاك مامي عامله ورق العنب اللي انا بحبه في الطاجن وانا بصراحه نفسي اكل منه وما اكلش اكل من بره
زعل جدا اسلام من جواه وبص لابنه وقال له
بقول لك ايه يا هادي هو انت مش ممكن تجيب لي طبق من ورق العنب اللي ماما عاملاه علشان واحشني جدا
جاوبه هادي
حاضر يا بابي من عيني طبعا هجيب لك
وصل هادي البيت هو وباباه وفضل مستني في العربيه بره وبعد دقائق هادي خارج له بعلبه مغلفه ومليانه ورق عنب
اخذ منه وداها عند بقه وشم ريحتها واستمتع جدا لان دي اكلته المفضله وياسمين كانت بتعملها بحرفيه
وهو لسه في العربيه بص عليهم من الشباك بتاع الفيلا لقاها واخده اولادها في حضنها وبتهزر معاهم وبتجمعهم على الاكل
حس من جواه انه غلط غلطه شنيعه في حق الملاك اللي كان متجوزه وقعد يفتكر مع نفسه عيد الميلاد اللي كان عامله له والليله اللي سهرتها جنبه وهو تعبان ومريض بتراعيه
وابتسامتها وحضنها اللي كانت كل يوم قبل ما ينزل الشغل تديه له ونظافتها وترتيبها واهتمامها بكل صغيره وكبيره بتفاصيل حياته
وبص لعيلته الصغيره والدموع اتجمعت في عينيه من اللي عمله في نفسه لمجرد شكل خارجي اغراه ولكن لما تعمق في التفاصيل طلع فالصوا واننا ما نحكمش على الحاجه من لمعتها واننا ما نبدلش الغالي بالرخيص علشان خاطر الخساره ما تهدش اللي اتبنى في سنين
رجع على مكتبه نام فيه وما قدرش يروح لرانيا واللي خلاص قرر ان هو يطلقها من اسبوع واحد بس عاشه ليل ونهار معاها مش مجرد ساعات كان بيروح يقضيها مفكر ان هو كان كده في الجنه
وتاني يوم طلق رانيا وبعت لها ورقه طلاقها واللي اول ما شافتها انصدمت وما توقعتش ان ممكن يعمل كده
وراح على بيته وضرب الجرس وكالعاده اميره البيت هي اللي فتحت الباب واللي اول ما شافها حس ان روحه رجعت له
وفورا اخذها اخذها في حضنه وقال لها
انا اسف يا حبيبي سامحيني وما تسيبنيش انت لو سبتيني انا هضيع حقك على قلبي يا روح قلبي
ولأول مره في حياته دموعه تنزل وهو في حضنها والدموع دي زلزلتها من جواها وحسستها انه فعلا راجع ندمان
بس تماسكت وحاولت ما تضعفش وقالت له
خلاص فات أوان الأسف يا اسلام واللي انكسر ما بيتصلحش وانت ما كستنيش انت دبحْتني ودست عليا بالجامد قوي
بص اسلام جوه عينيها وحاول يستعطفها
لا يا ياسمين إنتي طول عمرك قلبك طيب وكبير وهتسامحيني على الغلطه الكبيره اللي انا معترف بيها واوعدك انها مش هتتكرر تاني وان انا صلحتها وطلقتها ورجعت لك يا اصيله
حست بوجع من جواها وردت عليه
اديني سبب واحد خليك تتجوز عليا وتجرحني الجرح الكبير ده
اديني تقصير واحد قصرته في حقك وفي حق بيتي وفي حق ولادي يخليك تقهر قلبي بالشكل ده
انا بجد اتدمُرت
مش هقدر اكمل معاك ولا اثق فيك بعد كده انا اديتك كل حاجه وما اخذتش منك غير الضربه القاضيه
نزل اسلام على رجليها يبوسها علشان تسامحه وقبل ما يوصل لرجليها بعدت فورا لأنها ما ترضلهوش الاهانة دي مهما كان ابو ولادها ومش بس كده ده حبيبها وحبيب عمرها
وقالت له بدموع
انت سبتني اتوجع لوحدي واداوي الجرح لوحدي وما هانش عليك تاخدني في حضنك وتعوضني عن جرحك ليا وقضيت معاها ايامك اللي فاتت وسبتني انزف لوحدي
ما تتصورش كم الزعل والتعب والقهرة من اهمالك فيا وانت سايبني لمجرد اني قلت لك ابعد عني واني هتطلق وما حاولتش تتحايل وسبتيني لوجعي ولجرح قلبي ينهو على اللي باقي ما بينا
راح عليها جري وشدها لحضنه وهو ماسك فيه بايديه وسنانه وقال لها بدموع شديده
لا ياسمين إنتي مش هتسيبيني علشان خاطر انتي سيبانك ليا معناه موتي
انا راجع لك ندمان ومعترف بالذنب والاجرام في حقك وطالب منك العفو والسماح
وصدقيني عهد عليا لحد ما اموت ما فيش غيرك ولا قبلك ولا بعدك يا كل عمري
حاولت تفلت من حضنه لكن ما قدرتش لانه كان ماسك فيها جدا ومش عايز يسيبها وما كانش قدامها غير أنها تعيط بحرقة على اللي عمله فيها
بس ياسمين عاقله جدا فوق الحدود وقررت انها ما تهدش بيتها ولا تدمر نفسيه اولادها ببعد ابوهم عنهم وشافت انه طالما راجع معتذر وندمان وصلح الغلط هي هتتنازل وهتكمل معاه علشان لازم المركب تمشي
كل دمعة نزلتها من عينيها كانت بتقطع في قلبه وبتكويه وراح ماسك وشها بين ايديه وباسها من راسها وقال لها
حقك عليا بسبب دُموعك اللي نزلت بسببي
حقك عليا على الليالي اللي قضيتيها مقهوره بسببي
حقك عليا على غلطتي اللي كانت هتدمرني وهتدمرك وهتدمر اولادنا
وكمل وهو بيبرر لها
وعايزة اقول لك على حاجه انتي عمرك ما قصرتي معايا ولا عمرك اهملتي في حقي ولا عمري شفت منك الا كل الخير والحب والحنان والقلب الكبير
العيب مني انا انا اللي طاوعت الشيطان وجريت وراه
انا اللي نزوتى هي اللي ضيعتني وكانت هتضيعك من بين ايديا انتي ما لكيش ذنب في اي حاجه
الذنب ذنب انا وانا اللي لازم أصلحه
ومسك ايديها الاثنين وباسهم وفي كل بوسه باعتذار وندم
وسامحته ياسمين ووافقت انها ترجع تعيش معاه ووثقت فيه علشان خاطر ولادها وبيتها ما يتهدوش وسامحت اسلام بقلبها الكبير قلبها الحنين اللي دايما مليان بالخير وما بيعرفش يجرح وما بيعرفش يزعل وما بيعرفش يقسى
ساعات بناخد قرارات في وقت غلط علشان خاطر كرامتنا بس بتكون اه حفظت كرامتنا لكن ضيعت حاجات تانيه قصادها فلازم حبه تنازل من كل الاطراف علشان خاطر الحياه تستمر وطالما الأمل موجود والاعتذار من المخطئ متوفر يبقى لازم المقابل يبقى مقبول
وتوتة توتة خلصت الحدوتة
انتهى الاسكريبت
القلب الطيب
فاطيما يوسف
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”




