هو عرف؟
ضحك ضحكة خفيفة وقال
لا يا مدام سارة
على حد علمي هو لسه فاكر إن كل حاجة باسمه
قفلت المكالمة وأنا ببص للملف قدامي
وفي اللحظة دي سمعت صوت مفتاح بيتحط في باب الشقة
اتجمدت مكاني
مين اللي دخل؟
البنات نايمين
وأنا ما كنتش متوقعة حد ييجي
وبعدين سمعت صوت خطوات بتقرب من الصالة
وصوت سليم جه من بره
سارة!
أنا عارف إنك هنا
فتحت باب الأوضة ببطء
لقيته واقف قدامي
لكن المرة دي ما كانش لوحده
كان معاه نورهان
وهي حاطة إيدها على بطنها
وسليم بصلي وقال
إحنا جايين ناخد حاجاتنا من الشقة
وبعدين بص للملف اللي كان في إيدي
وفجأة وشه اتغير
وقال
إيه اللي معاكي ده؟
سليم قرب مني خطوة ومد إيده ناحية الملف وقال بعصبية
إيه اللي في إيدك ده يا سارة؟
رجعت خطوة لورا وقولت بمنتهى الهدوء
ملف قديم يخصني
ضحك بسخرية وقال
يخصك إنتي؟ من إمتى وإنتي عندك حاجات تخصك من غير ما أعرف؟
بصيتله في عينه وقلت
من قبل ما أعرفك حتى
نورهان كانت واقفة وراه بتبصلي من فوق لتحت وبعدين قالت
سليم إحنا مش جايين نتخانق معاها خلينا ناخد حاجاتنا ونمشي
بصيتلها وقلت
حاجاتكم؟
ابتسمت وقالت
أيوه الشقة دي بقت لسليم وإنتي خلاص مش مراته
ضحكت ضحكة قصيرة
وقلت
واضح إن سليم ما قالكيش كل حاجة
وشه اتغير وقال
سارة بلاش ألعاب
فتحت الملف قدامه وطلعت عقد الشقة
حطيته على الترابيزة وقلت
اقرأ الاسم بنفسك
سليم مد إيده وأخد العقد
وأول ما عينه وقعت على اسمي وشه اصفر
قال بصوت واطي
ده… إيه؟
قلت
عقد الملكية
قال بعصبية
مستحيل
قلت
ليه مستحيل؟
قرب العقد من عينه وكأنه مستني الاسم يتغير
وبعدين رفع عينه وقال
إنتي لعبتي في الورق؟
ضحكت
قلت
إنت عارف كويس إن التوقيع ده توقيعك
سكت
نورهان قربت منه وقالت
سليم قولها إن الورق ده مش معناه حاجة
بصيتلها وقلت
طب استني لما تشوفي عقد العربية
طلعت الورقة التانية وحطيتها قدامه
مسكها بإيد بتترعش
وبمجرد ما شاف اسمي عليها رماها على الترابيزة
وقال
إنتي كنتي بتخططي لإيه من ورايا؟
قلت
أنا ما خططتش لطلاقنا
إنت اللي خططتله
إنت اللي قررت إن بنتينا مش عيلة كفاية
وإنت اللي قررت إن ولد من واحدة تانية هيخلي حياتك تبدأ من جديد
نورهان اتوترت وقالت
سليم أنا مش فاهمة
لف ليها وقال
اسكتي دلوقتي
بصيتله وقلت
أول مرة أشوفك خايف كده
