فتحت الرسالة مرة تانية وأنا مش مصدقة اللي شايفاه قدامي وفضلت أراجع الأرقام رقم رقم يمكن أكون قريتها غلط لكن لأ المبلغ كان واضح قدامي ١٨٠ ألف جنيه خرجوا من حسابي الساعة ٨ و٤٧ دقيقة الصبح يعني قبل ما حماتي توصل عندي بحوالي نص ساعة
حسيت إن نفسي اتقطع ومسكت طرف الكرسي وقعدت وأنا بقول لنفسي مستحيل كريم يعمل كده من غير ما يقولي مستحيل يكون هو اللي حوّل الفلوس
لكن أول ما فتحت تفاصيل العملية لقيت حاجة خلت إيدي تتجمد
التحويل كان معمول من حسابي أنا
مش من حساب كريم
ومش محتاج أكون عبقرية علشان أفهم إن اللي عمل التحويل كان معاه بيانات حسابي أو وسيلة يقدر يدخل بيها عليه
مسكت موبايلي واتصلت بالبنك بسرعة وشرحت للموظف إن فيه تحويل كبير اتعمل من حسابي من غير إذني
الموظف طلب مني بياناتي وبعد كام دقيقة قاللي بصوت هادي
مدام حضرتك بتقولي إن العملية مش بتاعتك لازم نوقف الحساب فورًا ونبدأ اعتراض رسمي
قلت له أيوه طبعًا وقفوه حالًا
وبعد ما قفلنا المكالمة فتحت سجل العمليات وبدأت أراجع كل حاجة
وهنا كانت الصدمة التانية
لقيت إن خلال الشهرين اللي فاتوا فيه تحويلات صغيرة خرجت من حسابي بمبالغ مختلفة
٥٠٠٠
٧٠٠٠
١٠ آلاف
وفي كل مرة كنت فاكرة إن الفلوس اللي اختفت دي أنا اللي صرفتها
لكن لما ركزت أكتر لقيت إن التحويلات كلها كانت رايحة لنفس الحساب
نفس الحساب اللي اتحول له الـ١٨٠ ألف جنيه
حسيت بقشعريرة في جسمي
مين صاحب الحساب ده؟
فتحت تفاصيله وفضلت أبص للاسم كام ثانية
كان الاسم
أحمد ناصر
الاسم مكنش غريب عليا
لكن أنا عمري ما حولت له جنيه واحد
وقتها موبايلي رن
كان كريم
بصيت على اسمه على الشاشة وقلبي بدأ يدق بعنف
رديت
الو
صوته جه طبيعي جدًا وقاللي صباح الخير يا حبيبتي
قلت له كريم إنت فين؟
قاللي في الشغل مالك صوتك متغير ليه؟
سكت لحظة وبعدين قلت له
إنت كلمت والدتك النهارده؟
اتوتر وسكت ثانيتين
وقاللي ليه بتسألي؟
قلت له لأنها كانت عندي
قال بسرعة عندك؟
قلت له أيوه وكانت عايزة فلوس
ضحك ضحكة متوترة وقاللي أمي دي مبتبطلش طلبات
قلت له كريم أنا مش بتكلم عن طلباتها
أنا بتكلم عن ١٨٠ ألف جنيه
الصمت اللي حصل بعدها كان أطول من أي إجابة
قلت له كريم؟
سمعته بياخد نفس عميق وقاللي إنتي عرفتي؟
اتجمدت مكاني
عرفت إيه؟
قاللي بصوت واطي ماما قالتلك؟
صرخت فيه قلت له قالتلي إيه يا كريم؟
سكت تاني
وبعدين قال جملة واحدة خلت الدم يهرب من وشي
قاللي الفلوس دي أنا اللي طلبت منها تاخدها
قلت له تاخدها منين؟
قاللي من حسابك
صرخت فيه إنت مجنون؟
قاللي اسمعيني بس
قلت له مفيش حاجة هسمعها بعد اللي حصل ده إنت أخدت ١٨٠ ألف جنيه من حسابي من غير إذني؟
قاللي الفلوس مش ضاعت
قلت له أمال راحت فين؟
قاللي أنا عملت كده علشان أحميكي
ضحكت من شدة الصدمة وقلت له تحميني من إيه؟
فضل ساكت
قلت له كريم رد عليا
وأخيرًا قاللي
في مشكلة كبيرة حصلت في شغلي
ولو الفلوس دي مدفعتهاش النهارده أنا ممكن أخسر كل حاجة
وقبل ما ألحق أتكلم سمعت صوت حد عنده في المكتب بيقوله
يا أستاذ كريم لازم تخلص دلوقتي قبل ما الموضوع يوصل للشرطة
اتسمرت مكاني
قلت له مين اللي بيكلمك؟
لكنه قفل المكالمة في وشي
فضلت أبص للموبايل وأنا مش عارفة أعمل إيه
وبعد أقل من دقيقة وصلتني رسالة جديدة
رقم مجهول
فتحتها
وكان مكتوب فيها
لو عايزة تعرفي الـ١٨٠ ألف جنيه راحوا فين اسألي حماتك عن أحمد ناصر
لكن قبل ما أستوعب الرسالة جالي اتصال تاني من رقم مجهول
رديت وأنا مترددة
وسمعت صوت راجل بيقول
سارة؟ أنا عارف إنك متخيلة إن جوزك هو اللي سرق فلوسك
بس الحقيقة إن كريم نفسه مش عارف الفلوس دي راحت لمين
سكت لحظة وبعدين قال
ولو عايزة تعرفي الحقيقة لازم تيجي لوحدك للمكان اللي هقولهولك
قلت له إنت مين؟
قاللي
أنا الشخص الوحيد اللي يقدر ينقذ جوزك من السجن
وقبل ما أقوله أي كلمة تانية قفل الخط
وفي نفس اللحظة وصلتني رسالة فيها عنوان مكان في آخر القاهرة
وتحت العنوان جملة واحدة
متقوليش لكريم إنك جاية… لأن في حد من بيته بيراقبك
قفلت الموبايل وحطيته قدامي على الترابيزة وأنا حاسة إن دماغي هتنفجر من كتر الأسئلة اللي بتجري فيها مين أحمد ناصر؟ وليه حماتي تعرفه؟ وإيه اللي كريم مخبيه عني؟ والأهم مين الشخص اللي بيراقبني من بيتي؟
فضلت قاعدة كام دقيقة وأنا بحاول أهدى نفسي لكن صوت جرس الباب خلاني أنتفض تاني
بصيت ناحية الباب من غير ما أتحرك
الجرس رن مرة تانية
قربت من العين السحرية وبصيت
مفيش حد
فتحت باب الشقة بالراحة وبصيت في الطرقة لقيت ظرف أبيض واقع قدام الباب
نزلت خدته وقفلت الباب بسرعة
فتحت الظرف بإيد بتترعش
جواه صورة
أول ما شوفتها حسيت إن الدنيا لفت بيا
الصورة كانت لكريم واقف قدام محل في منطقة شعبية ومعاه حماتي نوال
لكن الغريب إن الصورة كانت متصورة بالليل
وكان واقف جنبهم راجل أنا عمري ما شفته
قلبت الصورة من ضهرها
لقيت مكتوب بخط واضح
أحمد ناصر
وتحت الاسم تاريخ من أسبوعين
قعدت على الأرض وأنا مش عارفة أتنفس
يعني الشخص ده موجود فعلًا
ومش مجرد اسم ظهر في التحويلات
قمت بسرعة وروحت ناحية اللابتوب وفتحت حساب كريم على مواقع التواصل
فضلت أدور على الاسم لكن ملقتش حاجة
بعدها افتكرت حاجة
كريم كان دايمًا بيقول إن موبايله مبيفارقوش وإن شغله كله عليه
وفي الفترة الأخيرة كان بيخرج من البيت بدري ويرجع متأخر جدًا
وكل ما أسأله كان يقول ضغط شغل
بدأت أراجع كلامه في دماغي
كل حاجة فجأة بقت شكلها مختلف
حتى يوم كان رجع فيه البيت الساعة ٢ بالليل وكان متوتر جدًا ولما سألته كان بيتهرب
وقتها كنت فاكرة إنه مجرد ضغط شغل
لكن دلوقتي حسيت إن فيه حاجة أكبر بكتير
وفجأة سمعت صوت عربية وقفت تحت البيت
جريت ناحية الشباك وبصيت من الستارة
كانت عربية كريم
اتخضيت
إزاي رجع وهو كان لسه بيكلمني من الشغل؟
نزل من العربية بسرعة وبص حواليه كأنه بيتأكد إن محدش شايفه
وبعدين دخل العمارة
جريت على الموبايل واتصلت بالراجل المجهول
الخط رن مرة واتنين وتلاتة ومحدش رد
سمعت مفتاح كريم وهو بيدور في كالون الباب
قفلت الموبايل بسرعة وحطيته في جيبي
دخل كريم
بصلي وقال
إنتي كويسة؟
قلت له وأنا بحاول أخفي ارتباكي
أيوه
قرب مني وقال
مالك؟
قلت له مفيش
بص في عيني شوية وبعدين قال
