الجزء الأول
محمود فضل ساكت قدامي وقت طويل لدرجة إني حسيت إن كل ثانية بتعدي بتكشفلي حاجة أسوأ من اللي قبلها
بصيتله وقلت
إنت ليه ساكت
رد بصوت واطي
عشان مش عارف أبدأ منين
ضحكت ضحكة مكسورة وقلتله
ابدأ من الأول يا محمود
من أول ما نجلاء دخلت حياتك تاني
اتنهد وحط إيده على وشه
وقال
نجلاء كانت أول حب في حياتي
حسيت إن الكلمة نزلت على قلبي زي الحجر
أول حب؟
يعني كل السنين اللي عشتها معاه وكل التعب وكل اللي عملته عشانه وعشان ولادنا كان ممكن يختصره في جملة واحدة
إنت كنت بتحب واحدة تانية قبلي؟
هز راسه وقال
أيوه
سألته
وكنت ناوي تتجوزها؟
قال
كنت ناوي
بس حصلت مشاكل بين العيلتين وانتهت الحكاية
بصيتله وقلت
وانتهت فعلا؟
سكت
وهنا عرفت إن الإجابة لأ
قربت منه وقلت
نجلاء رجعتلك إمتى؟
قال
من حوالي سنة
حسيت بصدمة أكبر
يعني طول السنة اللي فاتت وإنت عايش معايا في نفس البيت وبتفطر معايا وبتنام جنبي وبتضحك مع ولادنا كنت بتقابلها من ورايا؟
قال بسرعة
مش بالشكل اللي إنتي متخيلاه
صرخت فيه
أمال إيه الشكل اللي ينفع أتخيله يا محمود؟
قام من مكانه وبدأ يمشي في الصالة
وبعدين وقف قدام الشباك وقال
نجلاء رجعت عشان تطلب مني حاجة
قلت
إيه؟
قال
فلوس
بصيتله باستغراب
فلوس؟
هز راسه
أيوه
قالت إنها مديونة وإن حياتها اتدمرت وإنها محتاجة مساعدة
ضحكت بسخرية
وإنت طبعا كنت المنقذ؟
قال
أنا ساعدتها مرة
مرة واحدة؟
محمود ما ردش
فتحت الموبايل قدامه وقلت
يبقى تفسرلي الرسائل دي
قعد ساكت
فتحت أول رسالة
وبعدين التانية
وبعدين صورة ليهم واقفين قدام كافيه في وسط البلد
قلتله
دي مساعدة؟
وبعدين فتحت صورة تانية
كانوا قاعدين في عربية محمود
قلت
