مشيت جنب جابر وأنا ساكتة ومش فاهمة أنا بعمل إيه ولا رايحة على فين وكل اللي كان في دماغي ساعتها أبويا
كنت عايزة أرجعله المستشفى
كنت عايزة أقوله اللي حصل
كنت عايزة أعرف هو فعلاً طلب من نوال تطردني ولا هي بتكدب عليا
وفجأة جابر وقف وقال
استني هنا
بصيتله باستغراب
وقلت
هتعمل إيه؟
قال
هكلم حد ييجي ياخدنا
سألته
إنت مين أصلاً؟
سكت ثواني وبعدين قال
واحد شافك بتخرجي من البيت ومعاكي شنطة ومحدش حاول يمنعك
قلت
يعني إيه؟
بصلي وقال
يعني اللي حصل جوا مش طبيعي
ضحكت بسخرية رغم دموعي
وقلت
طبيعي أو مش طبيعي خلاص
أنا اتطردت
جابر قرب خطوة وقال
إنتي متأكدة إن أبوكي هو اللي طلب منهم يطردوكي؟
هزيت راسي
وقلت
مش عارفة
قال
طيب والشنطة؟
بصيت للشنطة وقلت
دي هدومي
قال
متأكدة؟
بصيتله باستغراب
وقلت
أيوه
رد بهدوء
لا
دي مش مجرد شنطة هدوم
قلبي دق بسرعة
وقلت
إنت عرفت منين؟
قبل ما يرد سمعنا صوت عربية بتقف جنبنا
جابر فتح الباب الخلفي وقال
اركبي
رجعت خطوة لورا
وقلت
أنا مش هركب معاك
قال
لو عايزة تعرفي الحقيقة عن أبوكي اركبي
الكلمة دي خلتني أتجمد
ركبت من غير ما أفكر
العربية اتحركت
وأنا طول الطريق ماسكة الشنطة في حضني
بعد حوالي عشرين دقيقة جابر طلب من السواق يوقف قدام كافيه هادي في شارع جانبي
نزلنا وقعدنا في ترابيزة بعيدة عن الناس
حطيت الشنطة على الكرسي جنبي وقلت
اتكلم
جابر بص حوالينا وبعدين قال
أبوكي كان خايف
سألته
خايف من إيه؟
قال
من نوال
ضحكت وقلت
نوال مرات أبويا
قال
أنا عارف
قلت
إنت تعرفها؟
ما ردش
فقلت بعصبية
إنت مين؟
حط إيده على الترابيزة وقال
أنا مش الشخص اللي إنتي فاكراني
قلت
يعني إيه؟
قال
العربية اللي عطلت كانت حجة
أنا كنت جاي عشان أقابلك
بصيتله مصدومة
وقلت
تقابلني ليه؟
قال
عشان أبوكي بعتلي رسالة قبل ما يدخل المستشفى
ساعتها حسيت إن نفسي اتقطع
وقلت
أبويا؟
طلع موبايله ووراني رسالة
كانت قصيرة جداً
لو حصل لي حاجة وما رجعتش البيت بنتي لازم تعرف الحقيقة
إيدي بدأت ترجف
وقلت
الحقيقة إيه؟
جابر قال
لسه ماعرفناش كلها
لكننا عرفنا إن فيه حد كان بيمضي مكان أبوكي على أوراق مهمة
بصيتله
وقلت
مين؟
قال
لسه بندور
سألته
طب ليه ما تقوليش لأبويا؟
قال
لأن أبوكي حالته الصحية ساءت فجأة بعد ما بدأ يسأل عن الأوراق دي
سكت
وحسيت إن كل حاجة حواليا بتلف
وبعدين افتكرت حاجة
قلت
الملف
جابر رفع عينه بسرعة
وقال
أي ملف؟
بصيت للشنطة
وقلت
أنا مش عارفة
بس قبل ما أخرج من البيت سمعت نوال بتقول للخدامة
خلي كل حاجة في أوضة المكتب تتنقل النهارده
جابر قام بسرعة
وقال
افتحي الشنطة
فتحت السوستة وأنا إيدي بتترعش
هدوم
كتب
كام ورقة
وبعدين لقيت ظرف بني صغير مدسوس تحت بطانة الشنطة
بصيت لجابر
وهو قال
طلعيه
طلعت الظرف
كان مقفول بشريط لاصق
فتحت الظرف
وأول ما شفت اللي جواه حسيت إن الدم اتسحب من وشي
كان فيه ملف كامل
وعليه اسم أبويا
وفي أول صفحة كان فيه عقد نقل ملكية
لكن التوقيع اللي عليه كان توقيع أبويا
ومع ذلك أنا كنت متأكدة إن أبويا عمره ما وقع الورقة دي
قلبت الصفحة
لقيت عقد تاني
وبعدين توكيل
وبعدين ورقة أخطر من كل اللي شفتهم
كشف بتحويل مبالغ ضخمة من حساب أبويا لحساب باسم شركة محدش في العيلة يعرفها
جابر خطف الورق من إيدي
وقعد يقلب الصفحات بسرعة
وفجأة وشه اتغير
قلت
في إيه؟
رفع عينه وقال
إنتي لازم ترجعي المستشفى دلوقتي
سألته
ليه؟
قال
لأن التاريخ اللي على أول ورقة هو تاريخ دخول أبوكي المستشفى
اتجمدت
وقلت
يعني إيه؟
قال
يعني حد كان بيستخدم توقيع أبوكي وهو على سرير المستشفى
وبعدين قلب آخر ورقة
وكان عليها توقيع واضح
وتحت التوقيع اسم الشخص المفوض باستلام الأموال
جابر قرب الورقة مني
وقال
اقري الاسم
قريت الاسم مرة
واتصدمت
لأن الاسم ماكانش اسم نوال
ولا اسم حد غريب
كان اسم الشخص اللي كنت بثق فيه أكتر من أي حد في حياتي
أخويا الكبير كريم
رفعت عيني لجابر وقلت بصوت مخنوق
مستحيل
هو أخويا
جابر رد بهدوء
عشان كده لازم نعرف الحقيقة قبل ما نواجه أي حد
وفجأة موبايل جابر رن
بص للشاشة
وسكت
قلت
مين؟
قال
المستشفى
رد بسرعة
وبعد ثواني وشه اتغير تماماً
قفل المكالمة وبصلي
وقال
أبوكي فاق
قلبي ارتاح للحظة
لكن جابر كمل
وأول كلمة قالها للممرضة كانت
إنجي فين؟
وبعدها طلب حاجة واحدة بس
قال لهم يمنعوا نوال وكريم من دخول أوضته
لأنه عرف أخيراً مين اللي خانُه…
أول ما سمعت إن أبويا فاق طلبت من جابر نروحله فوراً وفضلت طول الطريق ساكتة وأنا ماسكة الملف في حضني كأني ماسكة حياتي كلها بين إيديا
كنت لسه مش مستوعبة إن اسم أخويا كريم موجود على الورق وإن أبويا كان طالب يشوفني أنا بالذات
وصلنا المستشفى ودخلنا بسرعة لكن قبل ما نوصل لأوضة أبويا وقفني جابر وقال
استني
بصيتله وقلت
في إيه؟
قال
اللي هتدخلي عليه دلوقتي مش أبوكي اللي خرجتي من عنده الصبح
قلت
يعني إيه؟
قال
أبوكي فاق بعد ما سألوا عنه وقال اسمك
بس هو عارف إن فيه حد بيسمع
قلبى انقبض
وقلت
مين؟
بص ناحية آخر الطرقة وقال
نوال وكريم وصلوا
بصيت ورايا
ولقيت أخويا واقف عند باب المستشفى ونوال جنبه
أول ما عيني جت في عينه حاول يقرب مني
لكن جابر وقف بينا
كريم قال بعصبية
إنتي كنتي فين؟
بصيتله وقلت
في مكان إنت وأمي مرات أبويا رميتوني فيه
وشه اتغير
وقال
إنتي فاهمة غلط
ضحكت وقلت
غلط؟
طلعت الورقة من الملف ورفعتها قدامه
قلت
التوقيع ده توقيع أبويا؟
سكت
نوال تدخلت بسرعة وقالت
إنتي مجنونة؟ بتصدقي أي ورقة في إيدك؟
جابر قال
إحنا مش محتاجين نصدقها
المستندات هتتراجع من خبير خطوط
نوال بصتله بخوف لأول مرة
أما كريم ففضل ساكت
وده كان أكتر حاجة خوفتني
لأن كريم طول عمره كان أول واحد يدافع عن نفسه
لكن المرة دي ماقالش كلمة
دخلنا عند أبويا
كان وشه شاحب وأنفاسه ضعيفة لكنه كان صاحي
وأول ما شافني دموعه نزلت
وقال
إنجي
جريت عليه ومسكت إيده
وقلت
أنا هنا يا بابا
شد على إيدي بكل قوته وقال
أنا آسف
فضلت أعيط وقلت
على إيه؟
قال
كنت عارف إن نوال بتبعدك عني
بس ماكنتش متخيل إنها هتوصل لكده
بصيتله
وقلت
هي عملت إيه؟
أبويا حاول يتكلم لكن نفسه انقطع
الدكتور طلب مني أهدى
لكن أبويا مسك إيدي وقال
المكتب
روحي المكتب
جابر سأله
مكتب البيت؟
هز راسه
وقال
الخزنة
وبعدين بصلي وقال
الرقم معاكي
اتصدمت
وقلت
أي رقم؟
قال بصوت ضعيف
عيد ميلاد أمك
أول ما قالها حسيت بقشعريرة في جسمي
نوال كانت طول عمرها بتكره أي حاجة تخص أمي
وأبويا اختار تاريخ ميلادها بالذات عشان يفتح الخزنة
جابر قال
محدش يدخل البيت لوحده
هنروح ومعانا محامي
لكن قبل ما نتحرك دخلت ممرضة بسرعة وقالت
الدكتور طلب إن الزيارة تنتهي
خرجنا
ولما وصلت عند باب المستشفى لقيت كريم واقف مستنيني
قال
إنجي أنا محتاج أكلمك
قلت
اتكلم
قال
أنا ماخنتكيش
قلت
اسمك موجود على الورق
قال
عارف
قلت
إزاي؟
سكت شوية وبعدين قال
لأن نوال استخدمت اسمي
قلت
يعني إيه؟
قرب مني وقال
أنا مضيت ورقة واحدة بس
قلبي وقع
وقلت
إيه الورقة؟
قال
كانت ورقة لإدارة شركة أبوكي مؤقتاً
نوال قالت إن الدكتور طلبها
قلت
وأنت صدقتها؟
قال
ماعرفتش إنها مزورة
جابر كان واقف بعيد لكنه سمع الكلام
قرب وقال
فين النسخة؟
كريم رد
في البيت
جابر قال
إذن هنرجع البيت دلوقتي
كريم بصلي وقال
بس في حاجة لازم تعرفيها قبل ما نروح
قلت
إيه؟
قال
اللي موجود في الخزنة مش مجرد أوراق
سألته
إيه الموجود؟
قال
أبوكي كان محتفظ بتسجيلات صوتية
تسجيلات لنوال وهي بتتكلم مع شخص تاني
قلت
مين الشخص؟
كريم بص للأرض وقال
مش عارف
لكن آخر مرة سمعت التسجيل
كانوا بيتكلموا عن التخلص منك
جسمي كله اتجمد
قلت
التخلص مني؟
هز راسه
وقال
أنا حاولت أوقفهم
بس لما هددوني إنهم هيورطوني معاهم سكت
بصيتله وأنا مش عارفة أصدقه ولا أكرهه
وفجأة جابر قال
مفيش وقت
لازم نروح البيت قبل ما حد يعرف إن أبوكي فاق
ركبنا العربية واتجهنا ناحية البيت
لكن أول ما قربنا من الشارع لقيت حاجة خلت جابر يضغط على الفرامل
عربية سوداء كانت واقفة قدام الفيلا
قال
العربية دي كانت موجودة عند المستشفى
بصيت من الشباك
ولقيت راجل بينزل منها وبيفتح بوابة البيت بالمفتاح
كريم بصله وقال
ده مدير أعمال أبوكي
جابر بصلي وقال
إذن هم عرفوا إن أبوكي فاق
نزلنا من العربية بهدوء
ودخلنا من الباب الجانبي
البيت كان هادي بشكل مرعب
مفيش صوت مزيكا
مفيش ضيوف
ولا حتى نوال كانت موجودة
لكن باب المكتب كان مفتوح
دخلنا
ولقيت الخزنة مفتوحة
والأوراق متبعثرة على الأرض
جريت عليها
لكن الخزنة كانت فاضية تقريباً
إلا من صورة واحدة لأمي
وتحتها ورقة صغيرة مكتوب عليها بخط أبويا
“لو وصلتِ للورقة دي يا إنجي يبقى أنا ماقدرتش أحميكي”
قلبت الورقة وأنا بعيط
وكان مكتوب في ظهرها
“ما تثقيش في جابر”
رفعت عيني بسرعة
جابر كان واقف ورايا
وأول ما بصيتله لقيت ملامحه اتغيرت
وقبل ما أقدر أتكلم
سمعت صوت قفل الباب الرئيسي بالمفتاح
وبعدها صوت نوال من الصالة
بتقول
أنا كنت عارفة إنك هترجعي يا إنجي
وبعدين ضحكت وقالت
بس المرة دي مش هتخرجي من هنا برجلك…
أول ما سمعت صوت نوال وهي بتتكلم من الصالة حسيت إن رجلي اتثبتت في الأرض
بصيت لجابر والورقة لسه في إيدي
قلتله بصوت واطي
إنت عارفها؟
ما ردش
كريم قرب مني وقال
ماتسمعيش كلامها
لكن جابر رفع إيده وقال
محدش يتحرك
صوت خطوات نوال كان بيقرب من المكتب
وبعدين ظهرت عند الباب وهي بتبتسم
لكن المرة دي ماكانش معاها أي حد من الضيوف
كان معاها راجلين واقفين وراها
نوال قالت
أهو كلكم جيتوا
وبصت لكريم وقالت
حتى إنت
كريم رد
إنتي قولتيلي إن مفيش حاجة غلط
ضحكت وقالت
وأنا لسه بقولك
كريم قرب مني وقال
إنجي اهربي
نوال صرخت
محدش يتحرك!
الراجلين اللي معاها قفلوا باب المكتب
أنا بصيت للورقة اللي أبويا كتبها
“ما تثقيش في جابر”
وبعدين بصيت لجابر
وقلت
أبويا كان عارف إنك هتيجي؟
جابر أخد نفس عميق وقال
أيوه
قلت
